Metþátttaka á Grænlandsmótinu 2007!

Metþátttaka er á V. Alþjóðlega Grænlandsmótinu, Flugfélagsmótinu, og eru keppendur yfir 80. Tugir grænlenskra barna setja mestan svip á mótið, sem fer fram í glæsilegri íþróttahöll Tasiilaq-bæjar á Austur-Grænlandi. 

Pétur Jónasson er einn efstur með 5 vinninga eftir fyrri daginn. Í öðru til fimmta sæti eru Róbert Harðarson, Hrafn Jökulsson, Björn Þorfinnsson og Pétur Atli Lárusson með 4,5 vinninga. Á morgun, sunnudag, verða tefldar 5 umferðir til viðbótar og þá kemur í ljós hver verður fimmti Grænlandsmeistarinn í skák.

 Flugfélagsmótið er hápunktur skákviku Hróksins og félaga á Grænlandi og er óhætt að segja að vel hafi tekist til. Kátu biskuparnir úr Hafnarfirði héldu hátíð fyrir börnin í Kuummiit, liðsmenn Skákíþróttafélags stúdenta við HR sáu um fjörið í Kulusuk, og hér í Tasiilaq voru heimsmeistararnir úr Salaskóla í fararbroddi, ásamt Henrik Danielsen og öðrum vöskum skáktrúboðum.

 Fjölmenn barnaskákmót voru haldin í þorpunum þremur í vikunni. Hér í Tasiilaq tóku 44 börn þátt í Toyota-mótinu á fimmtudag og á föstudag tóku 66 þátt í Glitnis-mótinu, sem haldið var í Skákhöll Hróksins í bænum.

 

Rífandi gangur á austurströndinni

Nú er allt í bullandi gangi í þremur bæjum austurstrandar Grænlands. Fjölmennt barnamót var haldið í Kulusuk í morgun og að sögn Andra Gunnarssonar úr Háskólanum í Reykjavík, sem ásamt fimm félögum sínum heldur uppi rífandi stemningu þar, var hamingjan ósvikin hjá innfæddum og allir fengu fínar gjafir.

Þórður Sveinsson, sem fer fyrir leiðangri Kátra biskupa úr Hafnarfirði í Kuummiit, segir allt ganga vel og stanslaus taflmennska í grunnskólanum þar, þrátt fyrir að fyrsti skóladagur hafi verið í gær.

Hér í Tasiilaq gengur vel, Jóhanna Björg, einn hinna ungu heimsmeistara úr Salaskóla, tefldi fjöltefli í fyrri löngu frímínútum í skólanum í morgun og Páll í þeim seinni. Áhugasöm ungmennin hafa heimsótt leiðangursmenn í Forsamlingshuset, eða það sem við köllum skákhöllina, seinnipart dags og svo er teflt í skólanum á morgnana.

Henrik Danielsen stórmeistari og Salaskólaheimsmeistarar munu vera með kennslu þar í kvöld og á morgun verður barna og unglingamót, Toyotamótið.

Á föstudag verður svo Glitnismótið sem er öllum opið og væntum við þess að þetta verði hin mesta upplifun, enda flott upphitun hjá öllum fyrir Flugfélagsmótið um helgina.

Nú þessa stundina eru þau Jóhanna, Birkir, Páll, Patrekur og Eiríkur úr Salaskóla í gönguferð um Blómadalinn, með þeim Stefáni Herbertssyni formanni Kalak og Andra Thorstensen yfirljósmyndara ferðalanga og er veiðistöng með í för.

Veðrið hefur verið skínandi gott allan tímann og allir hressir. Á morgun bætast um tólf manns við hópinn og á föstudag verða 41 ferðalangar samankomnir í Tasiilaq.  Allt gengur ljómandi vel.

Bestu kveðjur, Arnar Valgeirsson

Myndin: Teflt fyrir utan félagsheimilið í Tasiilaq, eða skákhöllina. Myndina tók Andri Thorstensen.

Skákhátíð Hróksins og félaga á Grænlandi hafin!

Skákhátíð Hróksins og félaga á Grænlandi hefst þriðjudaginn 14. ágúst og stendur í viku. Hátíðir verða í þremur þorpum á austurströnd Grænlands og hápunkturinn verður V. Alþjóðlega Grænlandsmótið, Flugfélagsmótið 2007,  sem haldið verður í Tasiilaq helgina 18. og 19. ágúst.

Meðal leiðangursmanna er hinn frækna skáksveit Salaskóla í Kópavogi, sem í sumar varð heimsmeistari grunnskóla. Þá mun vaskur hópur Kátra biskupa úr Hafnarfirði sjá um skákhátíð í Kuummiit og liðsmenn Skákíþróttafélags stúdenta við Háskólann í Reykjavík slá upp skákhátíð fyrir börnin í Kulusuk.

Á Flugfélagsmótinu 2007 verður keppt um Grænlandsbikarinn, en fyrri sigurvegarar eru meistararnir Luke McShane (2003), Jóhann Hjartarson (2004), Róbert Harðarson (2005) og Henrik Danielsen (2006).

Þetta er fimmta árið í röð sem liðsmenn Hróksins standa fyrir alþjóðlegu skákmóti á Grænlandi. Fyrsta skákmótið í sögu Grænlands var haldið í Qaqortoq sumarið 2003 og við sama tækifæri beittu liðsmenn Hróksins sér fyrir stofnun Skáksambands Grænlands.

Skáklandnámið á Grænlandi hefur gengið framúrskarandi vel. Síðustu fjögur árin hafa Hróksmenn einbeitt sér að starfi á Austur-Grænlandi; meðal næstu nágranna Íslendinga í heiminum. Þar er félagslegt ástand einna verst á Grænlandi og því brýnt að fjölga gleðistundum hjá unga fólkinu.

Hrókurinn stendur að hátíðinni nú í samvinnu við Kalak, vinafélag Íslands og Grænlands, Skákíþróttafélag stúdenta við Háskólann í Reykjavík, Káta biskupa frá Hafnarfirði o.fl. Helstu bakhjarlar eru Flugfélag Íslands, Glitnir, Kópavogsbær, Orkuveitan, Toyota, Íslenskt grænmeti, Bananar o.fl.

Blindur skákdrengur á ísbjarnaslóðum

 

Barnaskákfélagið Hrókurinn hefur um árabil gert út leiðangra til Grænlands til þess að lífga upp á tilveru grænslenskra barna og kenna þeim skák. Leiðin hefur oftast legið til Tasiilaq á austurströndinni en í apríl fór leiðangur til Ittoqqortoormiit sem er betur þekkt sem Scoresbysund. Þar hitti leiðangursfólkið meðal annarra fyrir Paulus Napatoq, blindan 13 ára dreng, sem lætur fötlun sína hvergi aftra sér og sýndi ótrúleg tilþrif við taflborðið.

Paulus Napatoq er nemandi í grunnskólanum í Ittoqqortoormiit og hefur verið blindur frá fæðingu. Hann gengur þó um bæinn sinn og skólann sem alsjáandi sé, upp og niður tröppur, smeygir sér fram hjá stólum og borðum og er með öll sín leiðarkerfi skýr í kollinum. Hann hjólar um á sumrin og ekur um á hundasleðanum sínum á veturna.

Þessi sterklegi piltur sem þeysist um þorp sitt á fullu spani hefur þegar hafið nám í helstu skákfræðum, er meðlimur í nýstofnuðu skákfélagi bæjarins Tårnet (Hrókurinn) og var gerður að heiðursfélaga í móðurfélaginu á Íslandi. Hann er því heiðursfélagi númer 11 og kominn í hóp með ekki ómerkara fólki en Jóhannesi í Bónus, Patti Smith, Huldu Hákon og Össuri Skarphéðinssyni.

Hrókurinn hefur frá árinu 2003, undir styrkri stjórn Hrafns Jökulssonar, heimsótt öll byggðarlög á austurströnd Grænlands en í vor var loksins komið að þessu nyrsta byggða bóli austurstrandarinnar.

Skákheimsóknir Hróksins hafa alltaf lífgað upp á tilveru heimfólks, enda hefur félagið haldið fjögur alþjóðleg skákmót á Grænlandi, gefið hundruð skáksetta og tekið þátt í stofnun skákfélaganna Löberen (Biskupinn) í Tasiilaq og nú Tårnet í Ittoqqortoormiit. Skákvæðingin hefur því gengið vonum framar og samskipti Íslands og Grænlands hafa aukist og styrkst, ekki síst fyrir atbeina Stefáns Herbertssonar, formanns Kalak, vinafélags Íslands og Grænlands, en hann hefur verið leiðangursstjóri í mörgum þessara ferða.

Í marslok lagði þriggja manna leiðangur af stað til vikudvalar á þessum fallega stað þar sem ríflega 500 manns búa. Fólkið ferðast ekki mikið milli þorpa, enda eru 800 kílómetrar í nágrannaþorpin Kulusuk og Tasiilaq. Einangrunin er því töluverð ekki síst þar sem engir eru vegirnir, og flugvélar og þyrlur eru helstu samgöngutækin.

Fallegt verður og 17 gráðu frost

Þegar þau Ólafur Kolbeinn Guðmundsson, Íris Randversdóttir og Arnar Valgeirsson lentu á þyrlupallinum skartaði bærinn sínu fegursta. Það var glampandi sól, logn og -17°C frost og þannig var veðrið meira og minna allan tímann.

Ólafur og Íris bjuggu í góðu yfirlæti á heimili skólastjórahjónanna en skólastjórinn, Peter von Staffeldt, var þó fjarverandi allan tímann þar sem hann sat fastur í Kulusuk. Ulla, konan hans, er kennari við grunnskólann og reyndist hópnum ómetanleg hjálparhella. Rétt eins og kennarinn Jörgen Thomsen sem hýsti Arnar.

Börnin í þriðja til ellefta bekk fengu kennslu í mannganginum og helstu skáktrixum síðustu tvo dagana fyrir páskafrí en í fríinu komu börnin svo í tugatali í skólann, sem var opinn vegna heimsóknarinnar, til að tefla meira. Krakkarnir tóku líka þátt í fyrsta móti hins nýstofnaða skákfélags sem gekk framar vonum.

Paulus Napatoq gaf sig fram skömmu fyrir skákmótið og var fljótur að tileinka sér fræðin. Hróksfólkið hreifst svo af dugnaði piltsins, elju hans og áhuga á skákinni að ekki þótti annað koma til greina en að gera hann að heiðursfélaga.

Paulus fékk sérstaka aðstoð Hróksfólksins og með hjálp eins kennara síns, fyrrnefnds Jörgens, hlaut heiðursfélaginn nýi fallegt skáksett til eignar auk skýringasetts sem mun auðvelda honum lærdóminn.

Paulus hafði þó ekki tíma til að vera með í mótinu því hann hafði sett hundana sína fyrir sleðann og var á leið í Uunartoq eða Kap Tobin, sem er lítill bær hinum megin við ísilagt sundið, sjö km frá Ittoqqortoormiit. Bærinn er kominn í eyði en veiðimenn halda þar til auk þess að þar eru bústaðir fyrir ferðamenn. Stór og feitur ísbjörn hafði verið felldur þar helgina áður þegar hann trítlaði inn í bæinn. Þar sem börn í skólaferðalagi voru í bænum þótti ekki annað hægt en koma bangsa fyrir kattarnef. Allmargir ísbirnir voru á sveimi á sundinu þessa vikuna en þeir hætta sér ekki inn í Ittoqqortoormiit þar sem hundarnir liggja í breiðfylkinu við minni sundsins og gæta bæjarins.

Samvinna Hrókanna

Allir sem gerðu sér ferð í skólann á mótsdegi, hvort sem var á barnamótið að degi til eða fullorðinsmót að kveldi, fengu vinninga og gjafir frá Íslandi. Glitnir og Hrókurinn lögðu til vinningana; boli, húfur, USB-lykla, skáksett og –tölvur auk þess sem íslenskt sælgæti fylgdi með. Nú eru öll börn og unglingar í Ittoqqortoormiit því vandlega merkt Glitni, einnig þau yngstu því barnaheimilið í bænum fékk boli og húfur og auðvitað skáksett.

Sigurvegari þessa fyrsta móts grænlenska Hróksins var hin 17 ára gamla Ikila Brönlund og á eftir komu þau Kamilla Lorensen og Jonas Madsen, sem eru bæði nokkru yngri. Hver bekkur grunnskólans í bænum á nú skáksett. Tårnet á ríflega tuttugu sett og helstu samkomustaðir þorpsins eru með taflborð uppi við.

Síðasta skáksettið af þeim sextíu sem hópurinn flutti frá Íslandi stendur tilbúið á Constable Pynt, einmanalega flugvellinum í norðri þar sem ferðalangar geta stytt sér stundir yfir tafli. Þar er bókin Skák og mát einnig til taks vilji byrjendur taka eina bröndótta á leið sinni á norðurheimskautið.

Ólafur Kolbeinn og Arnar tóku þar eina slíka meðan beðið var eftir vélinni til baka og eftir miklar sviptingar, fórnir og fléttur hafði Ólafur Kolbeinn, forseti hinna Kátu biskupa í Hafnarfirði, sigur þar sem hvítu hrókarnir tveir þjörmuðu orðið óþægilega að svörtum kóngi Arnars.

Þessi stutta skákheimsókn mun seint gleymast þremmenningunum og bærinn og íbúar hans heilluðu þau svo að þegar er farið að huga að endurkomu. Paulus og aðrir meðlimir Tårnet mega því eiga von á öðrum leiðangri fyrr en síðar og þá munu hinir íslensku og grænlensku Hrókar setja upp veglegt mót. Þá er ekki loku fyrir það skotið að heiðursfélaginn blindi muni lóðsa gestina í sleðaferð í leit að hvítum böngsum við sundið magnaða.

Grein þessi birtist í Mannlífi á vordögum. Birt með góðfúslegu leyfi ritstjóra.

www.hrokurinn.is

Skákfélag stofnað við Scoresbysund

Skákfélagið Hrókurinn slær ekki slöku við í skáklandnáminu á Grænlandi. Þriggja manna sendinefnd á vegum félagsins hefur undanfarna daga dvalið við Scoresbysund og tók í dag þátt í stofnun skákfélags á svæðinu. Nýja félagið nefnist Skakforetning Turnen, eða Skákfélagið Hrókurinn, eftir systurfélaginu á Íslandi.

Hrókurinn hefur sótt Grænlendinga heim reglulega undanfarin misseri fyrst og fremst í þeim tilgangi að auðga tilveru grænlenskra barna og opna augu þeirra fyrir skáklistinni. Hrókurinn hefur einbeitt sér að austurströnd Grænlands á síðustu árum og komið reglulega við í bænum Tassilaq en nú var gerð atlaga að einangruninni við Scoresbysund. Þar hefur leiðangursstjórinn Arnar Valgeirsson verið ásamt Ólafi Kolbeini Guðmundssyni, forseta Kátu biskupanna í Hafnarfirði, og unnustu hans Írisi Önnu Randversdóttur.

Íslendingarnir hafa staðið fyrir skákmótum og séð um skákkennslu fyrir krakka á staðnum og gleðin náði hámarki í dag með stofnun skákfélagsins. Við þetta tækifæri var hinn 14 ára gamli Paulus gerður að ellefta heiðursfélaga Hróksins. Hann er blindur en ratar um allan heimabæ sinn og helstu byggingar auk þess sem hann hefur lært að tefla með góðum árangri með því að þreifa á skákmönnunum.

Grænlensk hvunndagshetjan unga er kominn í góðan félagsskap heiðursfélaga Hróksins en þar eru fyrir meðal annarra pönkdrottningin Patti Smith, Jóhannes Jónsson í Bónus, Össur Skarphéðinsson, alþingismaður, Karl Hjaltested, fyrrum vert á Grand Rokk, Árni Höskuldsson, gullsmiður, Páll Bragi Kristjónsson og listahjónin Hulda Hákon og Jón Óskar.

www.mannlif.is
www.hrokurinn.is

hitt og þetta um grænland, löberen og tårnet

 Ferðalangarnir þrír sem voru í Ittoqqortoormiit hér um daginn tóku ástfóstri við staðinn. Allir áttu þó ferðir að baki á austurströndina en höfðu þó ekki farið svo norðarlega. Verið er að vinna í að koma ferðasögunni myndskreyttri á prent. Það er semsagt pæling að heimsækja skákfélagið Tårnet þarna norðurfrá strax í haust, þó ekki fyrr en eftir að hópur manna, kvenna og barna hefur farið til Tasiilaq í ágúst að heimsækja skákfélagið Löberen - biskupinn - sem þar heldur til. Væntanlega verður þar stórkostlegt mót eins og undanfarin sumur.

Arnar hélt fyrirlestur um Grænland og ferðir Hróksins, sérstaklega þá nýjustur, á vinnustað sínum, Vin að Hverfisgötu, sem er eitt af athvörfum Rauða kross Íslands. Sem betur fer hafði hann Stefán Þór Herbertsson, formann vinafélags Íslands og Grænlands, KALAK, með sem andlegan stuðning og gott var að fá komment frá honum inn á milli því Arnar er nú enginn sérfræðingur, en það er hins vegar Stefán. Þau Óli og Írís áttu ekki heimangengt á þessum tíma enda rúmlega brjálað að gera og frítíminn, sem reyndar er enginn eða þannig, fer í að taka myndir á glæsta kameru og glænýja. 

Fyrirlesturinn gekk alveg prýðilega þar sem myndir frá ferðum og plaköt grænlens héngu á veggjum og grænlenskir litlir fánar voru á víð og dreif (hafiði pælt í því hvað fáninn er flottur). Allir voru dolfallnir yfir myndunum enda litirnir og himininn og bara allt eins og í ævintýri, svei mér þá. Nú mun hugsanlega hefjast röð fyrirlestra og myndasýninga en saga landsins er stórmerkileg, landið er stórmerkilegt, fólkið er frábært og börnin stórkostlega dugleg. Þau Arnar, Óli, Íris, Hrafn Jökuls og Stefán Herberts, og fleiri, eru örugglega til í að vera með kynningu í máli og myndum á næstunni.

 Góðir grannar í vestri, ekki nokkur spurning.

Tårnet, skákfélag heldur sitt fyrsta skákmót

Gærdagurinn var rosalegur. Um fjørutiu krakkar ad tefla strax fra kl. 10 i skólanum. Fórum á fund Otto Christensens, gjaldkera kommúnunnar, sem lýsti hamingju sinni med komu leidangursmanna. Jarl Jensen, formadur bæjarráds kom svo og setti fyrsta skákmót hins nýstofnada skákélags sem stýrt var styrkri hendi af Knud Eliassen, formanni Tårnet, sem er akkúrat Hrókurinn sjálfur.

32 tóku thátt og tefldar voru fimm umferdir. Sigurvegari var Akila, sautján ára, Kamilla Lorensen vard ønnur og Jónas Madsen og annar ungur piltur urdu thridju. Allir fengu vinninga, boli, húfur, tøskur og fleira frá Glitni en their efstu taflsett eda skáktølvur. Happadrætti var einnig med flottum vinningum og gledin skein ur hverju andliti.

13 ára piltur, Paulus Napatok, sem blindur hefur verid fra fædingu fékk stutta kennslustund og nádi undraverdum árangri. Hann ekur um á hundasleda eda hjólar um bæinn, gengur upp og nidur trøppur sem alsjáandi sé og er undrabarn sem á eftir ad slá i gegn. Meira um thad sídar...

Eftir glæsilegan kvølverd hjá Jørgen Thomsen, hjálparhellu okkar númer eitt, var brunad i skolann ad undirbua mót fyrir thá eldri sem eru ad størfum a daginn, i versluninni, póstinum eda a sledahundum um allar trissur, og mættu tuttugu manns, danir, svíar og grænlendingar og voru nokkrir afar efnilegir thátttakendur. Thetta var bara snilld og ekkert annad.

Formadurinn i Tårnet, hann Knud, 'asamt frú sinni henni Elnu, baud fulltrúum hins islenska Hróks heim i Kampavin um kvøldid thannig ad thad var hátíd i bæ.

Ad morgni midvikudagsins, i dag, fórum vid i barnaheimili bæjarins, færdum Dorit, yfirstýru thar, boli, húfur og annad dót, ásamt skáksetti. Slógumst svo vid børnin í snjónum og Óli og Íris ætludu ad taka einn med heim. Hættu thó vid a sidustu stundu.

Búin ad tékka inn a pósthusinu og thyrlan fer eftir tvo tíma. Margir hafa bodid adstod komi Hróksmenn aftur i Ittoqqortoormiit, sem their vissulega munu gera sídar og hver veit hvort thad verdi ekki bara heljarinnar mót á nyrsta byggda bóli austur Grænlands, adeins Thule er nordar og er thad vestanmegin lands.

Jamm, madur sefur vel vid ýlfur úlfhundanna á nóttunni medan ísbirnirnir trítla um a ísiløgdu sundinu. Loftid verdur ekki ferskara.....

Fram til sigurs.....ekki spurning.

AV

alveg eins og í sögu...

Skólinn var þétt setinn í dag. Allir að æfa sig fyrir átök morgundagsins. Mikið fjör, mikið teflt,  mörg barnanna voru í skólanum samfleytt frá kl. 10 - 17. En þau voru ekki alveg næringarlaus því Arnar gaf þeim sleikjó af og til við mikinn fögnuð! Já mikinn...

Glimrandi móttökur!

Já, það má með sanni segja að móttökurnar hafi verið ótrúlegar hér í norðrinu! krakkarnir hafa ekki getað beðið eftir að við kæmum að kenna þeim. "hvenær komiði í sjötta bekk, hvenær komiði í sjötta bekk?" Kona ein á förnum vegi réðist á okkur og sagði okkur hafa blásið börnunum gríðarlegan innblástur í brjóst, og þó nokkuð af fullorðna fólkinu hefur verið að spyrja hvort að það sé í lagi að þau fái að læra með börnunum. Við fréttum af því að örvænting hefði gripið um sig meðal framþjáðra, yfir því að menn væru jú í vinnunni þegar allur hasarinn væri! Við brugðumst að sjálfsögðu við af okkar alkunnu snilld og vorum fljót að skipuleggja kvöldkúrsa fyrir fullorðna. ALLIR SJÚKIR Í SKÁK Í SKORESBYSUNDI!!!

ÓK

Alltaf hasar á austurstöndinni!

Já, Það má nú með sanni segja að hasarinn sé aldrei langt undan! Í dag 1. apríl hafði ísbjörn einn verið svo óheppinn að væflast inn í Uunarteq (Cap Tobin), sem er í aðeins 7km fjarlægð frá okkur og vel sjáanlegt úr bænum. Þar eru bara veiðimenn með byssur sínar og veiðarfæri og hefði ísbjörninn sjálfsagt betur látið það eiga sig að mæta á svæðið því hann fékk heldur óblíðar móttökur! börn úr skólanum urðu heldur betur skelkuð, en þau eru þarna í skólaferðalagi. Ísbjörninn var víst kominn innan við 200m frá börnunum! Hann er nú látinn.

ÓK